Fogos [de Nanni Falconi]

B’ at fainas de sos òmines chi sunt agiuende sos fogos a fagher tretu. Sunt nargende chi ocannu nde sunt apichende de prus, ma deo non bi creo chi siant de prus de sos àteros annos, ma est petzi ca non bi resesso a cumprender proite diant esser apichende prus fogos.

Isetamus sos datos a fine annada.  A mie paret chi siant sceti fuende de prus a sa gente chi nde los cheret studare. Amus àpidu fintzas a como prus fogos chi benint tropu mannos pro chi non diant matana a los bincher. E tando su chi si podet fagher como, est a meledare  e a atibire a ite est chi nos fuint, chi s’ismanniant gasi meda fintzas a brusare migias de eteres. Chentza cumprender su chi est capitende, a los cumbatare e a perder sa cumbata est su matessi.

Non meledare assubra de chie los inchendet, chi tantu a cussa perra no est chi si andet a dae in antis meda, ma a cumprender sos proites de s’andada mala de ocannu. A mie paret chi sos motivos de sas derrotas de ocannu sunt paritzos, ma sos prus de importu sunt tres o bator.

Su de unu est chi est giai tres annos chi est faghende annadas sicas e sa terra arsada agiuat su fogu a currer. Est malu a studare, e subra custa cosa bi podimus fagher pagu e nudda, si no pregare chi proat lestru. Ma sas annadas andant e torrant, podet esser chi s’annu nou fatzat totu s’abba chi no at fatu in custos annos e a su mancu custu motivu non bi siat prus.

Ma giai bi nd’at a aer àteros, e cussos no est che scumparfant proende. Su chi non cambiat sa situatzione perigulosa de sos fogos chi resessint a fuire, penso chi nascat a una perra dae s’antropizatzione de su sartu, e a s’àtera perra dae s’abbandonu de sas terras, prus e prus cuddas chi non rendent.

Oe b’at gente meda chi abitat in su sartu, e in logos de mare in domos fraigadas petzi pro s’istiu. Fraigadas chentza abbaidare in nudda a su perìgulu de sos fogos. Comente e chi in Sardigna, ma mi paret cosa de totue, su fogu non siat una catastrofe. E custu esser in medas faghet crescher sas possibilidades de sa disantentzione, o fintzas de malu fagher cun cuscèntzia.

Sas prus de sas domos, sighende sa moda chi nos cheret totus fraighende domigheddas in mesu a sa natura, sunt imbuscadas e in perìgulu de esser inchesas dae su primu fogu chi bi passat acurztu. B’at biddigheddas estivas afaca a mare chi sunt stadas pesadas in mesu a sa malesa, a bias chentza mancu aer possibilidade de fuire.

Gente pagu avessa a su perìgulu chi su sartu, mancari siat bellu su cuntatu cun sa natura, batit cun issu etotu. Gente chi in casu de bisongiu depent esser amparada ca no ischit nen mancu a ue si furriare, furant tempus a sos operadores e strobbendelos dae su còmpitu issoro de cumbatare su fogu. E inoghe puru non si bi podet fagher nudda. Chi sa vida de sas personas est sa cosa prus importante.

Posca benint sos motivos struturales de su presente nostru. Unu de custos motivos est s’abbandonu de sas terras laoradas. Terras chi non  benint prus laoradas nd’amus semper de prus in Sardigna. Terras chi si sunt assilvende, a dolu mannu prus de malesa che de padentes. Terras chi si cherent bender ma chi neunu comporat e neunu traballiat.  Sunt che cuddas domos betzas intro sa biddas chi neunu cheret comporare nde las lassant ruer, e chi sos meres non s’ischint mancu ue sunt.

Non b’at cambiamentu generatzionale in sos cuile. O a su mancu prus pagu de su chi bi cheret pro aer una masseria sana. E sos cuiles chi imbarant ativos, semper de prus poberos, benint traballiados dae pensionados o dae persones solas, a su versu de sas famillias chi bi fiant in antis. Non si resessit prus a los mantenner comente si tocat. S’indebbitamentu est unu cannau a tzugru e impedit sos megioros ma fintzas una gestione curreta e sana de su cuile.

In  prus sos agiudos, dados dae sa Comunidade Europea a su possessu de su terrinu, mancari essende ligados a su laoramentu e,o s’allevamentu, a bias bastant a cuntentare sos meres.  Non lis cumbenit a los laorare e no nde laorant. Una tanca manna chentza laorada, lassada abbandonada, chentza pàschida, mancari in mesu a àteras chi lu sunt, est comente a ghetare benzina in unu fogu giai allutu.

E giai nde semus bidende ite nd’essit a campu. Fogos chi non si resessit a domare. Su pastore, su messaju, sunt stadu semper unu muru mannu contra sos fogos, fiant sos primos bolontarios, ca su fogu est megius a nche lu ochier atesu dae su cuile tuo, ma oe non lu sunt prus.

Tropu gente betza in su sartu. Un’àteru aergiu de custa emergèntzia,  est su nche cherrer sgarrigare totu sa preventzione subra de sos coddos de sos meres de sos cuiles, comente e chi su saltu non siat fintzas de onni tzitadinu. A fagher doas, a pulire sos padentes, sos tzirighinos, sos rios, sos cuiles e gasi sighende, a dies de oe at unu costu chi in medas non resessint prus a si pirmitire, fintzas si lu diant cherrer fagher.

No est pro sa mala bolontade, bivimus in unu tempus ue onni cosa est misurada cun su dinari. Est pensamentu de badas a pensare chi sos cuiles puru no lu siant. Issos puru sunt a intro de custa economia malàida. Sos cuiles puru sunt aziendas chi rispondent a sa lògica de su profetu in dinari, e si non b’est serrant e fallint.