Colcia la banca undi manca la balba bianca [di Quirina Ruiu]

Micàli s’era cuìuato ciòanu a 25 anni cu una paìsana soia, Mariuccia, ciòaneddha abbheddhu assennata e graziόsa e insembi aìani datu ‘ita a una familìa nùmmarosa: cincu masci e tre fèmini. Era statu sempri un maritu e un babbu amuròsu, paciόsu  e cu lu sò onestu trabaddhu di frailagghju  no aìa fattu mancà mai nuddha  a nisciunu. Illu paèsi era cunnisciùtu e mintùatu pa esse omu di bon cόri e sippuru cun sacrifiziu aìa pisàtu una familia onesta e dignitόsa. Era abbèddhu pazinziόsu, mai l’era isciùta di bucca paraula sgalbata né cun muddhèri, né cun fiddhòli; la familia era pa iddhu  sacra e come tali da rispittà e da tinè sempri in almunìa. Eppuru aìa passatu puru tempi mali, ma mancu pa chissu si disispiragghja, fiducciòsu illi sò folzi e ill’agghjutu di Deu.

Fèsi studìa li fiddhòli e  aèsi  la fultuna di ‘idèlli  sistemati e cuìuati. Ancόra sinnò l’aìa più in casa, ni sintìa  sempri la rispunsabilitai, prontu a dalli agghjutu si vi ni ‘ussia statu bisognu. Lu cόri d’un babbu  e di una mamma  sό sempri abbalti pa li sò fiddhòli. Lu tempu passa e cambigghja  paricchj cosi. Era statu cussì pa Micàli chi vinisi a paldì la muddhèri, propriu candu li fòlzi erani cumincendi a fassi dèbbili. A ottant’anni si ìdisi solu senza l’agghjutu e l’affettu di Mariuccia chi era stata pa iddhu l’appogghju più mannu. Si dispunisi l’animu a stà solu e a tirà a campà comu arìa pudutu sinnò fussia chi un malόri impruisu li causèsi paricchi acciacchi da no pudè stà più da solu. Fèsi pinsamentu di faiddhanni cu lu fiddhòlu più mannu si lu pudessìa tinè in casa cu iddhu.

Maltinu aìa una casa manna e bè attrezzata pa pudè fa locu a lu babbu, ma la nura no era d’accoldu a tinè un ‘ecchju in casa, era una mobbilia  troppu ingombranti  lu sociàru e poi aìa li steddhi minòri e timìa chi li ‘ussìa  svariàti cun cόnti  chi no erani più a passu cu li tempi e paldipiù l’arìa guastàtu la faiddhàta  miscendìla cu lu dialettu. Minaccèsi puru chi si ni sarìa andata da casa si ‘ussìa intratu lu ‘ecchju. Maltinu timendi lu scandalu si idìsi custrettu a chjudì la janna a lu babbu. Micàli in cόri soiu ni suffrisi abbèddhu, idendisi riffiuttatu come lu pegghju pezzènti, limusinendi affettu, mai s’era crettu di inè a chistu bisognu, iddhu chi tuttu aìa datu pa li sό fiddhόli.  Fèsi la mattessi proposta a l’alti, ma, cà pa un muttìu , cà pa un altu, niscinu era in cundizioni di tinellu in casa cu iddhi. Mancu la più minòri chi era la più attaccata a lu babbu, fèsi mezu di inelli incontru pultendi come scusa chi la sò casa no era adatta pa tinè un ‘ecchju acciaccatu. Di comuni accoldu li fiddhòli diccidìsini  di pultallu a un ospiziu: chissu era lu locu adattu pa candu la passona no era più in gradu di dassi contu da sola.

Micàli, sippuru dispiaciutu pa lu cumpultamentu  di li fiddhòli, accittèsi la sò diccisiόni e si dèsi banda cu la dignitai chi aìa sempri aùtu; illa casa nόa si fèsi subitu a benvulè e vinìa trattatu comu  si miritagghja. No si pudìa lamintà di stà mali, ma li mancaìa lu calόri di li sόi e di li niputeddhi chi cu la sό innuzzenzia l’arìani allìviatu dalla tristura di la ‘icchjaia . Li fiddhόli cridìani d’essesi libbarati da una gruci manna, ma no aìani cumpresu lu bè chi aìani paldutu. La prisenzia d’ un vecchju illa familia è una ricchèsa manna; lu sò spirimentu e li sò boni cunsiddhi, timparati da lu tempu sό  un patrimoniu chi l’omu d’ogghj, presu da alti ritmi d’ita no resci più a mantinè a dannu soiu e di li nascenti bisugnosi d’ esempi folti pa affruntà chisti tempi cussì avanzati in celti campi e tantu indaretu inn’alti.

Micàli era l’omu dalla balba bianca, l’elementu più impultanti chi mancaìa  in chissi bancati pieni di dugna bè di Deu, ma pόari di lu bè più mannu ch’è l’amόri  e lu spirimentu  di un minnannu.

*La scultura nella foto è di Anna Saba

di un  minnannu.

di un  minnannu.