Maria Caresima [de Margherita Moledda]

E sa Caresima puru est arribada (e bi semus in prenu). Nos ammentat sas baranta dies chi Gésus est abbarrau  in su desertu chentza manicare e chentza biber e tentau in milli modos dae su dimoniu. Anticamente, in custu tempus de s’annu, b’aiat in sa bidda nostra, Núgoro, un’ usantzia curiosa chi deo m’ammento comente chi siat oje.

In-d-una domo de bichinau, nighedda che-i su piche dae su fumadicu (ca bi fit su fochile in mesu domo), in-d’un’anguleddu  accurtzu a sa mesu porta b’aiat impiccada comente una cosa bella una figuredda in papiru-istratzu: iuchiat ocros, bucchichedda, naseddu, su truncu e sette tra bratzeddos e anchicheddas.

Si nabat Maria Caresima. Cada chida de caresima, un’anchichedda si-che tirabat e beniat ghettada a su focu. A sa fine, pro Pasca, abbarrabat solu sa conchichedda e su dossu. Dimandande a deretta e a manca, apo ischiu chi sas sette anchicheddas/bratzicheddas correspondian a sos sete peccaos capitales: “Mannosidade”( superbia), “Susuncuridade”(avarizia), “Luscura” (lussuria), “Inchietesa” (ira), “Gula” (gola), “Zelosia” (invidia), “Mandronia” (accidia).

Innorantes comente fimus, ma de bonu zudissiu, a Maria Caresima l’impiccaban in su muru pro s’ammentare chi nessi, nessi in cussu tempus de s’annu, depian facher a bonos, depian evitare cussos peccaos. Chie de nois, s’amentat de Maria Caresima?