Lu còiu gaddhùresu [di Quirina Ruiu]

Dugna populu ha li sò usànzi e custumi pà fistigghjà chistu passu cussì impultanti illa ‘ita di un omu ch’è lu cuiuàssi.Anticamenti, in Gaddhùra, lu còiu era un veru e propriu ritu da rispittà passu pa passu. No ci si cuiuà illa ciurràta di màlcuri e pà celti cridènzi mai illi mesi d’agliòla e di capidannu. Candu si ‘ulìa dummandà la manu d’una ciòana, si riccurrìa a una passòna spelta chi cunniscìa bè la sò familia: lu mandataggju, chi usualmenti  cumpìa la sò missioni a ora talda  pà no distà suspetti. Dìa esse passòna abbheddu abbili  ill’algumintà pà pudè innarià li viltù e li talenti di lu prattendenti.

A sigundu di l’attinzioni pristata da li familiari di la ciòana illu cuntrastu, lu mandatagghju avviltìa si fussìa lu casu di insistì o di cambià algumentu. Siddhu la missioni faddìa e la risposta fussìa stata cuntrària, lu mandatagghju vinìa sempri rispittatu; si li bucà come scusa chi la ciòana no era ancόra pronta pà fa chissu passu. Illu casu si ‘ussia statu d’accoldu, dapoi di una chita, lu prattindenti vinìa invitatu a casa di la prummissa sposa. La Pricunta era lu primmu passu previstu da lu regulamentu di lu còiu. Lu sigundu era lu spalisugnju. Si rindìa palésu l’intentu di li dui ciòani a parenti, amichi e paesani.

Lu paréri di li parenti era assai impultanti pa la bona risciuta di lu còiu.Siddhu calchedunu si ‘ussia pronunciatu cuntrariu, v’era lu rischu di scuncià tuttu. Sighìa l’abbracciu; tutti e dui li familii, insembi a li parenti più custrinti, si incuntrani in casa di la ciòana e in chista occasioni, l’omu rigalà l’aneddhu alla prummissa sposa, l’abbraccià e la basgjà no più alla cuata, ma in pubblicu. La prummissa divinìa ufficciali. Lu tuttu era accumpagnatu da offerti di dulci fatti in casa pà l’occasioni e da bringhisi cu lu muscateddhu. A ralligrà ancόra di più la ciurrata, no pudìa mancà lu canzunadόri, un puetta cantanti chi impruisà canzoni spiritosi e mutti di bon auguriu.

La dì di lu còiu, li familiari di la sposa sinni pisàni primma di iscì lu sόli pà mundà la piazza addananzi a casa primma chi fussia arriata la ghjenti di l’omu chi, a cabaddhu, si filmà addananzi a la casa sbarrata in modu simbόlicu  e si facìa una sigunda pricunta. Un parenti di la sposa, illu mitàli dummandà cosa erani cilchendi. La palti di lu sposu rispundìa: “aemu paldutu una culumbula bianca chena la cali lu sposu no po’  campà.”A chistu puntu, iscìa la sposa e tutti insembi si avviani a la ghjesgja accumpagnati da spari e soni si sunettu. Lu tuttu finìa cu lu gustàri a basi di suppa cuàta, carri arrustu, vinu e l’alligria di lu canzunadòri. Alla fini si finghja un rapimentu simbolicu di la sposa da palti di la ghjenti di l’omu e la reazioni di la mattessi e tuttu cumprìa in risati e abbracci.

Suventi, illi còi  nascìani alti còi, palchì erani pochi l’occasioni d’incontru pa li ciòani sinnocchè illi bibbenni, l’agliòla e sempri attenti a no fassi idè da li manni. L’unioni di dui passòni era un attu sacru da rispittà  sempri. Finzamenti a due seculi fa, lu còiu aìa tutta l’aria di una beddha fola chi no sarìa puduta cumprì mali e chi dugna ciòanu e ciòana sunnìani. A tempi d’ ogghj, li ciòani   hani timori di cuiuàssi. La familia no è più lu sό disìciu e lu sό fini ; s’appagghjani  in alti modi, mancu prittinziόsi, chena reguli e chena timori d’esse visti da li manni.

Li còi sò  sempri diminuendi o scumparendi .Sò più cumpriti e più cuscenti o  mancu siguri e indiffarenti  di li ciòani  di una ‘olta? Si dà culpa a li tempi, troppu difficili da affruntà in dui, ma  sarà lu ‘eru muttiu o  s’è paldutu lu filu illu scunvìu generali e ci s’è lacati andà a un disìciu sfunatu di libbàltai riffiuttendi chissu chi è statu dall’antichitai  unu di li passi più beddhi e più impultanti  pà l’omu? La familia nasci dall’amόri tra dui passoni e lu còiu è lu sucillu  chi fàci fidi a   chista intesa maraìgliosa di fronti a la nostra cuscènzia e a la suzzietài.