L’ultimu carrulanti [di Quirina Ruiu]

Prima chi ‘ussini invintatu la màchina a mutόri, lu traspoltu di li vàri malcanzìi vinìa fattu da li càrruli tragghjàti da bόi, da cabaddhi o asini. Lu mistiéri di lu carrulanti o sia di cà pussidìa un càrrulu e un pagghju di bόi era chissu chi dagghja un’ intrata sigura e uffrìa una celta garanzia pà lu sustentamentu di una familia. Lu càrrulu a bόi era lu mezu prifirutu pà lu traspoltu palchì era lu più cumpletu e si pudia adattà a vàri silvìzi. La sό fraicatura era όpara di lu mastru d’ascia e di lu frailagghju chi vi puniani tutta la sό spiriènzia e attinzioni pà garantì un traspoltu siguru.

Nummarόsi erani li sό silvizi: da lu traspoltu di la ligna pà scaldissi e pà cucinà, a li trabaddhi di laurugnu illi ‘igni e a carrià illi bibbenni. Lu càrru a bόi era prifirutu a lu cabaddhu e a l’asinu palchì si pristà a esse cunfattu sigundu lu chi si dìa traspultà, come ad esempiu candu li s’assistà la tumbarella, un cassoni chjusu chi pilmittìa lu traspultu di rena o pétra. Siddu era impultanti la bonitài di lu càrrulu, la bona risciuta di lu traspoltu era subbrattuttu meritu di l’abbilitai di lu carrulanti. Ghjuanni aìa ereditatu da lu babbu un càrrulu e un ghjùu dumati e dόzzili a esse cumandati. Era un cioànu assai assennatu e di cόri bonu. Essendi in etài di gadagnassi la ‘ita da solu e aendi intinzioni di fassi una familia, no indusgési a sighì lu trabaddhu di lu babbu. In paesi era lu più cilcatu tra li carrulanti, sia palchì era lu più onestu, sia palchì era lu più abbili.
Lu carrulu e li bόi erani tuttu pa iddhu. Aìa modi galbati, no li maltrattà comu facìani celti, ma era assai mudosu puru candu si li ribiddani. Li nutrìa bè, cun paddha e fai macinata subbrattuttu candu diani affruntà trabaddhi pisuti come lu laurunghju; punìa pazenzia e amόri e candu li bόi si filmani strimati da la stracchittù no li pugnia cu lu puntogliu pà falli sighì, ma li facìa piddhà alènu pà pόi sprunàlli a continuà, cun boni parauli. Candu traissà lochi di silva, punìa attinzioni chi no si ‘ussini impilchjati li corri illi fraschàgghj. Un bόiu chena corri no aìa più valόri e Ghiuanni lu sapìa bè. Aìa nummarosi fittìani e chistu li pilmittìa una ‘ita da benestanti ancόra si ‘ussia assai sacrificatu. La ciurràta cumincià chizzu pa iddhu. Iscìa a fatta di dì e a volti anticipà lu sόli candu dìa fà viagghi longhi e si dìa assintà pa calche trettu da lu paesi. M’ammentu candu dìa laurà li ‘igni di babbu chi erani a 6 km.

Ghiuanni si punìa in viagghiu la dì primma e allugghjà pa tuttu lu tempu uttili a cumprì lu trabaddhu inn’una casana, allonga da casa soia, in locu angenu, ma no si sintìa solu : la sό cumpagnia erani li bόi. Cuntrastà cu iddhi comu si fussini passoni e li rispundìani, mugghjendi; o candu carrià lu ‘inu da li lacchi indrentu a una cupa manna pà depositallu illa chintina: cantu attinzioni vi punìa a mantinè in acchilibriu lu càrrulu pà no pudessi ‘ultulà e paldì tuttu. S’era cuiuàtu a mannu e no aìa autu fiddhόli. Tuttu lu sό affettu erani li bόi, li sό cumpagni di trabaddhu e la sό garanzia. Dugn’annu, lu sό carrulu, abbidditu a festa, no mancà a fa onόri illa processioni a Santu Visidòru, santu prutittόri.

Candu cumincésini a arrìà li primi macchinari, Ghjuanni chi era oramai anzianottu, no aési lu curagghiu di abbandunà li bόi e cuntinuési a silvì li fittiani chi priffiriani lu sό silviziu. Cappittési chi, la vigghjlia di Natali, in una ciurràta frita, andési a ciuccà la sό ghjanna un celtu Maltinu, un babbu di familia chena trabaddhu supprichendilu chi li ‘ussìa carriàtu un barriu di ligna palchì erani murendi di fritu e paldipiù la muddhéri dìa palturì. Aìa dummandatu a alti, ma tutti s’erani riviutati. Ghjuanni no si la fési dì dui ‘olti; lu cόri soiu no li pilmittìa di dì di no; si carragghjési bè pà lu fritu, appruntési lu càrrulu e si l’avviési a la sό campagna undi aìa lacatu una catasta come pruista. Fési un beddhu bàrriu di ligna grossa e fini e lu pultési a casa di Maltinu chi stàgghja fora paesi.

Vinisi ringraziatu da tutta la familia chi s’era ‘ista sfrancata di murì. Era ghjà imbugghiendi candu piddési lu caminu di casa soia. Suparata la prima culva, illu meddhu avanzà, tuttu in una, li bόi si pisésini, forsi assuccunati da calche umbra. Ghjuanni tirèsi li funi chena riscì a duminalli e bόi e càrrulu si ‘ultulésini illa cunetta. La muddhéri, scretta, data l’ora talda, dési una bόci in paesi e andésini a cilcallu. Ghjuanni era stésu a tarra, come drummitu, tra un bόiu e l’altu.

Lu càrrulu e li bόi si salvèsini, ma chissu carrulanti onestu e sintimintosu cumprisi pà sempri lu sό amatu mestieri ill’alcana e stillata notti di Natali. In paesi si dìsi chi era statu chjamatu da lu Bambinu Gesù pà ricumpensallu di lu sό ghjestu d’amόri.