L’ agliόla e l’anticu présgiu di lu pani [di Quirina Ruiu]

Primma di l’invinziόni e di l’usu di li màchini agriccùli, li trabaddhi, illi campagni, érani tutti fatti a fόlza di bracci e di sfόlzi bistiàli. L’ùnicu agghjùtu a l’omu éra datu da l’animali come li bόi, li cabaddhi, l’asini chi vinìani utilizzati pa lu traspoltu e pa lu laurugnu. Ancόra si chissi tempi la me’ ghjnniraziόni no l’ha spirimintati di passόna, ci sò filmati imprimiti illa ménti da li cόnti di li nostri manni chi n’àni adducàtu l’ammentu e lu spiritu.

Illa me’ tarra di Gaddhùra, come in dugn’alta palti di la Saldigna, lu trabaddhu più pisùtu éra la cultivazioni di lu tricu. Li massài gaddhùresi érani abbìli e assai trabaddhadόri; sapìani affruntà cun pazenzia e spiritu d’uniόni dugna trabaddhu. Primma di punì a laόri li campi, bisugnà pripparà la tarra, libbaralla da la frasca e da la lama e brusgjà ( dibbìà ) , sighìa lu laurugnu cu l’aratu di lignu e dui bόi a tira cu lu ghjuàli. Era una ‘era ghérra sia pa l’omu che pa li bόi. Una ‘olta chi vinìa pripparatu lu tarrénu, si passà a la sémina a fόlza di bracciati e di sudόri pà spaglì la simenza.

A lu brànu, li campi cuminciàani a imbrutunà e li spichi di tricu granùtu parìani mari d’όru. Éra lu mumentu di zappittà pà bucanni l’albi arésti. Arriàtu lu mési d’agliόla li massài si pripparani pa la misséra. Da tutti li cussόgghj accudìa ghjenti pà la manialìa. Éra guasi un ritu anticu come l’omu. A fatta di dì, trumi di falciadόri avanzani illi campi come zilibricchi, trunchendisi e brusgjendisi la schina a lu suliόni. In silenziu, chena rumόri di muttόri e odόri di gas, solu lu fruscìu di la falcia chi, chena pietai, muzzà la spica granuta e infattu a lu missadόri sighìani li spiculadόri come ‘ussini stati agnùli custodi a ricuparà lu chi éra statu falciàtu.

Alti bracci fulmani li mannéddhi chi vinìani traspultati a lu rόtu ( aìa ) una piazzόla tunda undi li bόi attaccati a una mòla tribbiani lu tricu. Li massài, cuntenti e suddisfatti d’aè accapitatu lu fruttu di lu trabaddhu di tuttu l’annu, chjudiani la ciurràta in festa uffrendi a tutti la chjusunata insembi a pani, casgiu, ciùddha e pόmi accumpagnati da una tazza di ‘inu ruiu. Chistu éra lu presgju anticu di lu pani : fruttu di trabaddhu e sudόri, ma puru natùrali proffùmu di suddisfazioni e di spiritu d’uniόni.

Lu pani vìnia fattu in casa. M’ammentu candu mamma impastà subbra una banca di lignu la farina cu l’ea e la matrica e suicà l’impastu finu a intindèllu ciuccà. Chissi mani àbbili dagghjani folma a diffarenti scérii di pani: spianàti, pani a lόlga, pani bicchirinatu. Vinìa missu illi colbùli e carragghjatu e candu éra létu vinìa cottu illu furru a ligna. Lu proffùmu iscìa da la bucca di lu furru e invadìa tutta la casa e la carréra.

Da li primmi trébbi chi n’ aìani alliviatu lu trabaddhu, ogghj, cun tutti li macchinari chi s’àni a dispusizioni, lu pani no è più sudàtu come una ‘olta e no si trabaddha più in casa, ma l’agattemu dugna dì caldu illi bruttèi e ghjà incaltatu illi centri commerciali. Chena svalutà lu progressu di la tecnologia chi ha cambiatu li modi e li tempi di li trabaddhi agriccùli, lu saόri e lu proffùmu di chiddhu pani cottu in casa no esisti più, solu ill’ammentu di l’anziani chi hani àutu un rappoltu direttu cu la tarra e n’hani cunnisciutu li ‘eri saόri.

Li fésti paèsani cilcàni di tiné viì chisti antichi riti ripittendini l’imprési pà ammintà a li ciòani cantu è stata sacrificata la ‘ita di li nostri manni e pà dalli esèmpi fόlti chi li possini agghjutà a affruntà cun curagghju e spiranza un dumani sempri più riscόsu e inceltu e falli cumprindì lu ‘alόri di lu trabaddhu di la tarra e chi turrà a iddha no è un càsticu di timì.