|
Attirruti e scunviati sò l’animi
vassàatu ha lu mundu di li pegghju mali
ingrussàati di lagrimi si sò li mari
campusanti di nuzzènti molti.
Come alba mala cresci e si spagli lu tarròri
ghjabbendi strai a populi e nazioni,
in tuttu chistu imbùliu e disispéru
chi saòri arà Pasca di Natali’?
S’abbrarani li cόri e li mani
a carignosi ghjèsti
o diffidenti si chjudarani in bistiali egoismi
illu timόri di piotti multali?
S’accendarà di stélli lu céli
ghjόchi di luci allegrarani li carréri
schiddharani fistόsi rintocchi di campani.
In chista notti di maìa
sponarani li gherri, posarani l’almi
affuarà lu fόcu di lu mali
s’ affagnarani l’animi
in disìci e sonniì di spiranza,
pogliarani doni pastόri e re
a Lu Divinu Amόri.
Arà paci in tarra dugna cόri
scugnuratu l’ arrόri
tra canti e miludiì alcàni
sempri dulci sarà Pasca di Natali.
|
