Furriende dae su continente [de Nanni Falconi]

M’ammento de sa bia chi torrende dae Roma  mi so postu a arresonare in sardu in s’aereo cun frade meu. Si b’at una cosa chi non resesso a fagher cun issu est sa de arresonare in una limba chi non siat su sardu, mancari dae tantu in tantu nche imbole carchi paràula in gadduresu. No est pro nudda chi so in Gaddura dae passa de barant’annos.

Fiamus sètzidos a mesania de s’aparèchiu. Isetende a tzucare totus si la faghiant islanende pisi∙pisi. Chentza birgongia peruna non semus postos a arresonare de su biagiu nostru a continente. Bi fiamus andados a fagher unu còmpuru importante meda pro su benidore nostru. Posca de cussu amus sighidu cun berbeghes, casu e annadas malas. Cosas chi non nos sunt mancadas mai in bida nostra.

L’amus fatu chentza pensare a sos chi giughiamus a inghìriu nostru, a su mancu creo, ca sunt passados prus de trint’annos e a faeddare in sardu in pubblicu non fiat una cosa de fagher si ti cherias imbergher. Fiat a fagher bider chi fias unu “pastoratzu” comente narant in Tempiu sos pitzinnos cando ti si cherent cotzare suta.

Ma b’aiat pagu ite s’imbergher. A nois nos lu leghent dae sa persone chi semus ambos pastores. Penso chi siat pro sa manera nostra de caminare, o de manigiare sos bratzos e sas manos, o dae nos bider a bratzinconserta e a ancas spartas bene arressas in terra cando semus arresonende in grefa o chi calicunu. Non bi cheret un’antrapòlogo. E si nono non nos conoschent dae sas manos: semper grussas e cun sos poddighes forfigiados dae sas murghiduras fitianas dae minoreddos. Pro non narrer de sas ancas chi si sunt fatas a arcu mantengende sas berbeghes. Mancari deo apa muntu semper a sa logudoresa, e chi dae como barant’annos murga cun sa màchina de murgher, mi sunt imbarados totu sos pecos.

Sa die non mi cheria imbergher però, comente fia faghende un’àtera bia chi fia intradu a bider su museo de sos ufìtzios in Firenze. Apo crètidu chi bi fia resessidu fintzas a cando unu conca de matzolu de sardu passènde∙mi a costàgiu non m’aeret preguntadu si aia immandradu sas tràilas. Su sàmbene chi t’at fatu. Gasi si faghet cun unu turista…!

A s’iscuta chi fiamus faeddende de sas chistiones nostras mi so abistu chi in s’aereo, duos chi fiant a dae segus nostru, fiant faeddende in sardu issos puru. Los aia intesos bene chi in antis fiant arresonende in italianu. Storchende nos fiant! E posca de cussos, sos chi fiant in su setzidorgiu a costàgiu de su nostru si sunt postos issos puru a faeddare in sardu. E àteros ant sighidu a dae in antis e a dae segus de sos setzidorgios nostros. Apo pensadu chi fiamus stados nois a lis dare s’esempru.

Ite pecadu chi totus stemus apitu a si mover su bighinu nostru pro fagher carchi cosa de giudu.