Da Pasca a Capuannu un passu di ghjàddhu mannu [di Quirina Ruiu]

L’ultimu mesi di l’annu era chjamatu e, contunuigghja a chjamallu cussì cal’ha mantinutu la faiddhàta gaddhùresa, Natali a onόri di l’eventu divinu e tali festa è chjamata Pasca di Natali. Li ciurràti culti e bugghjosi di chist’alcu di tempu chi anda da li primmi finu a lu 21 di lu mesi hani, da sempri, stuzzicatu la menti e la fantasìa di l’omu. Li populi antichi aìani intesu chistu mutamentu apparenti illa rotta di lu sόli chi, agattendisi illu puntu più allonga da la tarra, paria si ‘ussìa spignendi e paldendi la sό folza, pa poi riprindissi e turrà a aumentà li sό ori di luci ill’ultimi ciurràti di l’annu.

 Lu sόli era adoratu come Deu e faciani festi a onόri soiu. Da steddha, m’ammentu un dittu chi li manni ripittiani e si tramandagghjani da babbu a fiddhòlu rigualdu a chistu fattu natturali, un dittu chi mi parìa abbhèddu curiosu e simpatticu :” Da Pasca a Capuannu un passu di ghjàddhu mannu.” La smannata di li ciurràti e l’aumentu di la luci di lu dì rispettu a la notti era paragunata a un passu mannu di ghjàddhu e lu tuttu facia puru rima e no era sciuaràtu pà cumbinazioni ; no pa nuddha lu ghjàddhu canta a fatta di dì. Li nostri magghjόri aìani unu spiritu allegru e si diiltìani a rindì altettantu curiosi li ditti rimendili.

Lìati a li cicli di la nattura e da iddha dippindenti, haìani imparatu a avvilguanni e studianni l’andamenti e li mutamenti e sippuru diùni di scenzia, faciani trisòru di li sό spirimenti sempri rispittosi di chissa mamma chi li dagghja nutrimentu, sintimentu chi manca a l’omu d’ogghj chi credi d’esse abbèddhu assappiutu e patronu di fà e scuncià comu li pari senza rispittà l’oldini natturali pà la sό inguldizia e poi piegni si la nattura si li ‘olta contru.

Tuttu lu sapè di li magghjόri vinìa affidatu a ditti chi passaìani da gjnnirazioni in gjnnirazioni e divintaìani ‘eri e propri reguli da rispittà, palchì fruttu di li sό sani spirimenti chi no erani senza fundamentu e ‘iritai; li nostri magghjόri sippuru no erani scenziati erani ricchi di bonsensu e li sό ditti no erani pa nuddha faulagghi.