Mariru miu presidenti [di Teresa Mundula Crespellani]

Teresa Mundula Crespellani (Cagliari 1894 – 1980). Finissima poetessa in lingua cagliaritana, ha lasciato due volumi di poesie e molti inediti. Tra questi pubblichiamo Mariru miu presidenti (1949-1953), un ironico resoconto del quinquennio in cui il marito, Luigi Crespellani, fu il primo Presidente della neonata Regione Sarda. Ringraziamo le figlie, Giovanna, Maria, Margherita e Teresetta Crespellani, per la cortesia e la disponibilità (ndr).

 MARIRU MIU PRESIDENTI

(1949-1953)

 Immoi ch’è Presidenti

nudda cosa è cambiara,

sa vira prus de prima

è a anima bogara.

Oi c’è unu senarori

oras c’esti unu ministru

sempri discursu ci oli,

sempri discursu friscu.

A me puru mi tocca

si non discursu ‘e fai,

si arribanta is ministras,

deppi curri ‘è trottai.

Cun froris e collanas

circu de fai figura

po no cambiai bistiri

e cambiai de bisura.

Chi no seu mancu Fregoli

besti e spolla a d’ogn’ora,

si ‘ndi bessu ‘e una mostra,

unu ballu c’è ancora.

M’è finzas capitau

a una xena de andai,

cand’emu in domu mia

già accabau de xenai.

Pappendi che pilloni,

senz’e gana, cun grisu

aintru de me ‘e tottu

mi nci scappà s’arrisu.

Festa a s’ammiragliau,

ritrovu a s’aviazioni,

fra ministrus, ministras

serierari s’imponi.

Inchinus, bacia manu

rendez-vous senz’e contu

in pari a chini bali

ci s’imboscà su tontu.

Chini è a camisa cirdina

bistiu a turradori

ndi boga bragherìa,

fai su grandu signori.

A custa genti in mesu

a bortas timu mera

deu puru po contagiu

ndi bissiri braghera.

Cun genti americana,

ministrus, ammiraglius

fueddu deu puru inglesu

beni cundìu de sbaglius.

Cuss’inglesu e franzesu

cun sardu ammisturau,

chi Deus mi perdoni

cun d’ogni atru peccau !

Arti, letteratura

deppu bogai a pillu

ma s’è sa una ‘e notti

non ci pongu sigillu !

Oi c’è riunioni ‘e Giunta,

cras de Cunsillu interu

cun certus, improperius

de veru ministeru.

C’esti s’imposta ‘e s’IGE,

certu, cun su Guvernu

seus a terra attaccaus

e non binceus su ternu.

C’iara bolli in terrazzu

prontu un aeroplanu

po fai manera ‘e benni

Roma a portara ‘e manu.

Cun Einaudi, De Gasperi

pigai accordu ci oli:

su Presidenti è benìu

cummissu viaggiarori.

Su telefunu in domu

esti sempri sonendi;

ci oliri portinaiu

chi sia sempri oberendi.

Genti disoccupara,

genti pobera in canna,

chi crei che sa Regioni

tenga ricchesa manna.

E no dis pozzu nai

chi è Regioni pipia,

chi bolliri allevara

e ch’è grazia chi è bia.

E ch’essi Presidenti

Presidenti sturrau

è unu problema malu,

seu po nai, intiaulau.

E sa Presidentessa

esti in grandu strintura,

su pagu chi tenìa

no si sci si di dura.

E rimprangiu cun issu

su tempu de già andau,

chi gorangià prus mera

candu fia abogau.

Senz’è contai in prus

ci funti is peis de angionis:

is pensamentus mannus,

is verus arrullonis.

Ci olinti palas largas,

comenti guardaroba;

po fai tottus cuntentus

c’iara bolli sa gobba.

Bandìus, famini, siri,

tottu deppi pagai,

si sighiri a no proi

ant’a issu incurpai.

Si una curpa a me puru

ant’a bolli donai

“citteìsi, si prumittu

chi m’app’arrimangai”

M’app’a ponni de impegnu,

finzas chi tengu vira,

ponni is nuis in manera

de fai proi d’ogna scira.