Lu scottisi: lu baddhu di Gaddhùra [di Quirina Ruiu]

Illa sigunda mitai di l’ottucentu, suffièsi  in Saldigna una ‘intata di mudernitai chi piddèsi pédi solu in Gaddhùra. Si diffundìsi   un baddhu abbeddhu galanu, chi in Francia vinìa dapoi di lu vàlzaru e di la masulka: lu scottisi. Era un anticu passu chi si baddhà illi culti di li re e chi, in Gaddhùra, si prisumi  sia statu  diffùsu da spilciuladόri cuntinentali, da calbunài e lignagghjόli tuscani, cummelcianti di bistiàmu cossi e suldati di Nelson a La Madalena.

Li gaddhùresi, sippuru pastòri e massài, erani abbeddhu diiltuti e amantiόsi di baddhi allegri, a diffarènzia di li saldi di l’  internu, chi aìani cadènzi più cuntinuti e fracuenti multivicati. Illi stazzi di li cussògghj di Gaddhùra, li massài, li ciurràti di  festa, illi piazzàli di li ghjésgi di campagna, s’impruisani caagliéri e dami, tra capri e ghjaddhini raspanti, tra licci e granitti. Un sunadόri di sunettu, pusatu subbra una banchitta di férrula, dagghja lu passu a li baddadόri.

Lu scottisi era un baddhu di coppia.  Cincu coppi pà volta  ghjràni illa scena cun  brinchi e inchini abbeddhu galani; lu caagliéri e la dama, sighenti la cadènzia, si distaccani pigghjendisi in inchini dapoi di un imbùliu tundu di  colpi e intrecciu d’anchi. Chistu baddhu diffundìa alligrìa e li dami erani galani e provocanti illi sò  muimenti aggrazziati e lestri,  svintulendi cu una manu la coda di la faldetta. Illu baddhu, li massài  sminticani dugna tristu pinsamentu. In chissi mumenti si lacàni andà a una ciòia sfrinata. Era un modu pà isfugàssi e libbarà  la menti da dugna cilévru  e puru un mezu pà cunniscissi e, fracuenti,  caagliéri e  dami s’ innammurani pròpiu  baddhendi.

Dugna cussogghja aìa la sò raìna di lu baddhu, la ciòana chi si distinghja da l’alti pà grazia e biddhèsa ed era  la più disìciata tra li dami. Una di chisti era Mariuccia, massàia- dama, chi illu baddhu mustrà tutta la sò abbilitai ed era lu scàsciu di li ciòani. Li sò modi e lu sò trattu, impannani l’alti dami. Era licèri, parìa una piuma in bòlu. Fracuenti nascìa calche mal muttu tra li caagliéri chi si la cuntindìani, ma poi tuttu si risgiulvìa in risa e cionfra, palchì li gaddhùresi erani e sό ancόra ogghj ghjenti amantiόsa di l’irunìa  e no sani tinè rancόri.

A distanzia di sècculi, l’amόri pà chistu baddhu no s’è paldùtu. Cà passa illi paesi di Gaddhùra, lì dì di festa, a fiancu a li musica di li baddhi muderni, resta culpitu da la cadènzia e da lu passu galanu di un baddhu , undi anziani e ciòani  si scatenani in passitti,  brinchi e inchini, in un traspoltu chi sa d’anticu, ma chi lu gaddhùresu ha  illu sangu. Lu scottisi resta ancόra ogghj in Gaddhùra lu baddhu   più diiltenti e duminatόri di  la scena.