Sa die ‘e sa memoria [di Nicola Loi]

Iscrio pro sa die ‘e sa memoria, /Chi s’omine mantenzat cuss’ammentu./

Sa ‘irgonza pius manna de s’istoria,/Chi postu at totucantos in turmentu./

Tratados che un’ ‘aca, o unu ‘itellu,/Istrupiados, nieddos, ebreos./

Mandados totucantos a masellu, /Postos in mesu a malos-anneos.

Sas mamas che sos sorighes tratadas,/Esperimentos pro s’umanidade.

Apertas, puntas a fines brujadas, /In numen de s’ariana beridade./

Los an passados tra fritu e fogu,/Sos betzos mannos e sa pitzinnia. /

Falados a chijina in-dogni logu,/Prejoneris de cussa tirannia.

Sos trenos pienaian a muntones,/Cun suferentzia e malu-tratamentu./

Peus de bestias postos in vagones,/Che-i su fumu chi moet su ‘entu./

Tratados che su peus bascaramene,/Fit un’inferru mannu not’e die./

Totu istasidos e morind’ ‘e famene,/In mesu a s’astraore e-a su nie.

In-d-una pena iscurtzos e nudos,/Sena isetu in su disisperu./

Ma totucantos sun restados mudos,/E oe naran puru: no est beru!/

Politicos de dogni natzìone, /An giradu sa car’a s’ater’ala./

Totus sos mannos de sa religione, /Cuddos in penas issos in sa gala.

Sa vida baliat una chibudda, /Non devian bogare mancu alenu./

Deretu los bochian pro unu nudda,/Pro eletricu, fogu o pro velenu./

E oe custa nostra umanidade,/Chi ancora gherrende est in totue./

Deviat connoscher pius sa piedade,/Però sighit a andare a pesa-rue.