Elena Lacon Visconti ghjùdicessa di Gaddhùra [di Quirina Ruiu]

La Saldigna è stata sempri una tarra disicìata, cuntèsa e sfruttata da pòpuli diffarenti intarissati a fà lu bonu pà iddhi mattessi. Tra lu IX e lu XV sècculu, sighenti la sparizioni di l’imperu bizantinu e timendi una invasioni tulca, la Saldigna s’era olganizzata in cattru Ghjùdicati autonomi : Càlari, Torres, Arborea e Gaddhùra, spissu cumpitidόri tra iddhi. Dugna ghjùdicatu era sighenti spaltutu in tredici curatorii ( curatorias ) cun pupulati ( villas ) dipindenti da una Capitali undi risidìa lu curatori.

Lu ghjùdicatu di Gaddhùra era lu più minόri e lu più pòaru e cumprindìa la palti nord-orienti di l’isula, laccananti a ovest cun chissu di Torres e Arborea e a sud cun Càlari, ma cumpinsatu da li scambi più fauriti tra la Còssica e la Pinisùla Italiana. La Capitali era Civita ( Olbia ) e aìa come stemma la fiura d’un ghjàddhu. Li ghjùdicati aìani legghj e rigulamenti più sumiddanti a chissi di l’imperu romano-bizantino chinnò a l’alti regni d’ Europa di la mattessi èppuca. Illu 1203, alla molti di Barisone I, vinìsi numinata eredi ligghjttima dalla Corona de Logu la fiddhòla Elena cu lu nommu di Elena di Gaddhùra. Elena era stata la primma in Saldigna a rignà pà dirittu propriu e una di li primmi in Europa
.
La femina aìa un rόlu assai impultanti illa suzzietài di l’èppuca e pudìa assumì impultanti gàrrighj. Essendi troppu ciòaneddha pà pudè guvirnà, ni piddhési la tutèla la mamma Odolina finu a candu si ‘ussia cuiuàta. Elena aìa nummarosi prattindenti, da li ghjùdicati, da potenzi furistèri come Pisa, Malaspina, Lamberto Visconti e Trasamondo nipoti di papa Innocenzo III, tutti intarissati subrattuttu a appatrunassi di lu ghjùdicatu. Illu 1203 lu ghjùdici di Càlari Guglielmo I Salusio Lacon, unu di li re più sfidiati di l’éppuca ghjùdicali, tintesi d’invadì la Gaddhùra, ma vinisi paràtu da papa Innocenzo III. Illu 1206, Elena oramai in etài di guvernà, si cuiuesi cun Trasamondo nipoti di lu papa, ma si spicchesini guasi sùbitu, sibbè l’insistènzi di chist’ultimu.

L’annu infattu, illu 1207, Elena di so’ naturali ‘ulintài, sciuarèsi come sposu Lamberto Visconti. Pal cantu lu papa li ‘ussia scuminicati, si spusèsini illa ghjésgia di Santu Simpliciu a Civita e Elena zidìsi a lu sposu lu guvernu di lu ghjùdicatu. Da Civita, si trasferiani , lu statiàli , in cilca di friscura illi castéddhi di Balàiana e Baldu illi campagni di Locusantu, undi ancόra ogghj si ni pòni ammirà li resti. Da chista unioni, nascisi Ubaldo, l’ultimu di li Lacon. Elena murisi a l’etài di 28 anni illu 1218, di paltu e fusi sippultata illa Basilìca di N.S. di Locusantu. La Gaddhùra paldisi la sό amata principessa, la primma femina chi aìa gadagnatu rispettu come femina e come rignanti. Lamberto si cuiuesi cun Benedetta di Càlari e cilchèsi d’allalgà lu ghjùdicatu cunchistèndi tarri nόi e aunendi palti di la Balbagia, Ogliastra, Anglona e Monteacuto. Fusi chista l’èppuca di maiόri fiuritura di lu ghjùdicatu. A la molti di Lamberto, lu tronu passèsi a lu fiddhόlu Ubaldo di 19 anni e no aèndi chistu autu eredi, ristèsi in manu a li Visconti di Pisa parenti di lu babbu e chisti aunisini la fiura di lu ghjaddhu a lu salpenti di li Visconti.

L’ultimu ghjùdici fusi Nino Visconti, fratili di Ubaldo, amicu di Dante e da iddhu mintuatu illa Divina Commedia. Nino aìsi una ‘ita tribbulata e trampόsa e murisi in tarra salda ghirrendi pà diffindì lu ghiùdicatu chi, illu 1323 passesi suttu la duminazioni catalana- aragonesa. Nόi patrόni, nόi paltimenti, nόi gherri in una tarra distinata a esse bistrasciata e sfruttata, illi seccùli, da la bramusìa di populi furistéri.