So’ Maistài “Ghjolghju Puntogliu” [di Quirina Ruiu]

In Gaddhura, candu si faeddha di carrasciali, si faeddha di Tempiu palchì n’ha mantesu l’usi e li custumi, illu tempu. Chista festa cussì allegra, stravaganti e pilmissiva ha radici abbeddhu antichi. La figura di “Ghjolghju”, re di lu carrasciali, è prisenti in èppuca pre-romana. “Giorgi “era chjamatu lu spiritu di la tarra fecunda e lucita e a chista diinitai s’ uffriani sacrifìzi illa spiranzia chi l’annu sighenti fussìa statu abbundosu. Illu passatu, li màscari più graditi da la ghjenti erani li “Buffoni” vistuti cun péddhi di ‘acca o di bόiu, cun cannai a almicόddu e sonu di schiddi, autorizzati a fà beffi di tutti li culόri a volti indizenti e valgugnosi, ma “ a carrasciali dugna burrula vali” e si dìani pà folza accittà.

Un alta figura era “ lu Traicogghju” chi, stendi a li brucciulési di lu pòpulu, era lu rumori chi facìa unu spiritu trasginendi peddhi di bόiu cu attaccati catinacci e pagghjόli ‘ecchi e pà appattallu li dìani uffrì muscateddhu e frisgioli. Lu Traicogghju rappresentà l’omu arestu, sumiddenti a alti mascàri di la Saldigna come li Mérdules, li Bòes chi hani mantesu la sò natura bistiali e infernali. Alta figura era la rèula : la prucissioni di l’animi pinitenti. A carrasciali si pudìani trasgridì li dittami civili e murali chena esse casticati : li femini si pudìani ‘istì da omini e l’omini da femini, lu pόaru da riccu e lu massaiu da cittadinu. Illi secculi 18° e 19° era una festa manna e abbeddhu sintuta cun canti , baddhi e abbuffati chi durà dui mesi da li “Tre Irrè ( Epifania) finza a Carrascialoni
(Pentolaccia) candu la tarra era ripusendi e li massai si pudìani abbandunà a lu diiltimentu.

La molti di “Ghjoglju” era pienta da li “Attittadore”, femini chi urrulani in una manera scalmintόsa (lu raspu) tantu da esse proibbitu da la Ghjésgia pa la sò crudesa. Ancora si chisti figuri sò filmati, ogghj lu carrasciali ghira tuttu intundu a “Ghjolghju Puntogliu” chi, in passatu, era rappresentatu da un buattoni vistutu di stracci accumpagnatu da un culdiόlu di linzoli bianchi ( linzoli cupalatati), da Sunadori e Domini nieddhi cu la cara cuàta. Ghjolghju, ogghj è un re di caltapesta cun tantu di curona e vistiri riali chi avanza pa li carreri di la cittadina accumpagnatu da” Mannena”la sό fideli sposa pupulana, da bandiadori e sunadori.

Impalsona la mascàra di lu Pudéri chi suventi sfrutta lu populu e chi solu dendili la molti si po’ libbarà da li so’infamitài. Pa sei dì, Ghjolghju veni primma lisingatu, clamatu finza a l’intrinata di malti grassu, candu cumencia lu processu pà li sò diffalti e chena pussibilitai di ricussu veni cundannatu a esse brusgjatu. Dapoi chi lu fucaroni s’ha manghjatu la vanitài di lu mundu, ghjà si pensa a la prossima festa, palchì si li fiami hani consumatu un buattoni, no hani spintu lu disicìu di diiltimentu di lu populu timpiesu chi in chista festa vi poni tutta la sò anima e impegnu chena timì fritu, ‘entu o nì ; basta pinsà chi tutti li carruli e li màscari sò fraicati da l’altisani di lu lόcu. Manni e minori si dani di fà dì e notti pà appruntà vistiri e cantu selvi palchì la festa sia sempri più beddha.

La “ Cionfra” pà sei ciurrati si scatena in una baldoria sfrinata. Da la Gaddhura e da dugna palti di la Saldigna e puru da lu cuntinenti cà si vò diiltì e magnà frisgjola longa e bì muscateddu bonu e vernaccia dibbata curri a lu carrasciali di Tempiu e li timpiesi, da boni gaddhuresi ospitàli e cultési, facini di tuttu palchì no sinn’andini discuntenti.