C’era una ‘olta la bruttéa… [di Quirina Ruiu]

C’era una ‘olta la bruttéa, accultu a  casa, undi s’andagghìa a cumparà chissu chi bisugnà  in familia e puru pa  fassi una ciavanata cu lu bruttiàiu chi era una passòna abbèddhu galbàta e cultési. Tra chistu e li sò fittiàni v’era una folti  lianza no solu commerciali, ma puru umana. Illi paesi di la Gaddhùra, la bruttèa era lu puntu di rifirimentu  di la carréra  ma puru di tutta la cussogghja. La ghjenti di li stazzi e di li campagni si facìani la pruìsta di l’alimenti pa tutta la chita e barattàni la sò frùttula nostràli cu alta chi li sò tarrèni no produciani.

Pa chista ghjènti di campagna, andà a cumparà a la bruttéa, era una ‘era festa pa l’aria amurόsa chi v’alinà. Tuttu si ‘indìa a la minuta. Li  fasgjόli, li fai e li fisudulci erani  in saccheddhi e cu la sàssula si misurà la cantitai chi silvìa a dugnunu. No v’era òbbricu di pacà in cuntanti; si dagghja la pussibilitai a li più bisùgnosi  di pacà a la  fini di lu mesi; dugna fittiànu pussidìa un librettu undi lu bruttiàu  signaìa la spesa di dugna ciurràta e a fini mesi  calculà la suma a iddhu duùta. Un pattu di fiducia e un agghjutu mannu pa ca s’agattagghja in difficultai e no dispunìa di cuntanti.

La bruttéa era una stanza ùnica; a lu centru, v’era un bancòni mannu di lignu cun tanti calàsci a vitri cun diffàrenti scèri di pasta, taddhàta o longa. Subbra lu bancòni, v’era la macchina a manovella pa affittà li salàmi, lu pesu cu li pisòni, lu macininu di lu caffè chi vinìa macinatu illu mumentu e lu sò aroma proffumà tuttu l’ambienti. Vasetti di ‘itru, di folmi e culόri diffarenti, pieni di caramelli e liccaldùgghjni, incantàni dugna steddhu chi v’intragghja.   Addarètu a lu bancόni v’erani li scaffali chi cuntiniani lu pani e, a li lati, li liccòri; in un’ agnata, lu bottu di  l’ociu d’ulìa chi vinìa ‘indutu sfusu; dugna fittiànu pultà l’ambula  boita da casa, una ghjusta manéra pa no inquinà. Erani tempi, undi la ghjènti preffirìa alimenti naturali, fatti in casa, e la bruttéa era sempri abbàlta puru li dì di festa, di modu chi, si pudiani cumparà tutti l’aìmini chi silvìani: da la farina pa lu pani a chissi pa li dulci tradiziunali come li cucciulédd’e méli, li papassini e li casgjatini. La spésa si facìa cun calma e passiόni, senza timόri d’esse presi a spinti  da la calca di la ghjenti in pressa.

Era un piacèri intrà a cumparà pa l’aria  chi vi si rispirà; parìa chi lu tempu si ‘ussia filmatu tra chissi muri cussì caluròsi e la cultisìa di lu bruttiàiu chi si sfrissurà pa accuntintà tutti. Ogghj, illu telzu millenniu, la bruttèa, cussì com’era nata, no esisti più. Li cateni di li supermercati, la corsa  affannata di la ghjènti strinta da la morsa di lu tempu, la sfidìata cuncurrenza, ha fattu scumparì chisti  ciòi di bruttèi  e cu iddhi la naturalitai di l’alimenti sempri più sufisticati a dannu di la nostra saluti. Si, un seculu fa , fà la spesa no era solu una nicissitai, ma puru  un beddhu passatempu, ogghj è un curri curri  scasciàtu tra li supercolossi di li malcàti  a caccia di l’offerti più cunvinienti pa pudè rispalmìà.

Illi paesi, si calche bruttèa s’è salvata, ha duùtu adattassi a la tecnologia e a li sò prodotti come li freezer e l’alimenti  pronti. Ha paldutu la sò  ‘era impronta , ma no lu sò calόri e l’attinzioni di lu bruttiàiu pa lu fittiànu chi continuigghja a sintissi una passòna e no unu nummaru  comu avveni illi cateni di distribuzioni, spessu allonga da lu centru storicu, undi pa arriavi bisogna esse attrezzati di mezi di traspoltu soi e undi  la passona paldi la sò identitai, tra chissi giganti senza cόri.

V’è tuttu lu chi poi disicìà, ma vi manca lu surrisu sincèru di lu bruttìaiu, la sò cultisìa, lu sò sapè fa pa accuntintà lu fittiànu chi, sempri più disorientatu, anda a destra e a manca, trascinatu da la pubblicitai e alla fini n’esci  bumbaldatu, imbaddhinatu e buliàtu rimpignendi la paci e lu calόri di chiddha bruttèa, accultu a casa.