Lu ‘istiri di la festa [di Quirina Ruiu]

Ill’anni sessanta, l’anni di la me’ciuintura, érani pochi li diiltimenti pà nόi ciòani. Pà cà stagghja illi paèsi era ancora pegghju. Finz’ a chindici anni nόi femini ghjucami ancora cu la puppìa e li màsci a latri e carabbinéri, a caddilonghj, a còa còa. Màsci e femini ci uniami in ghjòchi nuzzenti. Ci diiltiami illi festi di campagna undi si stagghja tutta la ciurrata all’aria abbalta e pudìami ghjucà chena nisciun frenu, ma lu nostru diiltimentu più mannu e più sintutu era la festa di lu paèsi.

Cascà sempri la primma duminica di magghju, candu lu branu era in pienu sprandόri di pruffumi e culόri e la ghjenti era in disìciu di un pocu d’alligria pà vincì la malincunìa di la stasgioni passata. Pà fà onori a li nostri santi patrόni, Santa Vittoria e Santa Anatolia, dui vìglini romani, si cumincià due mesi primma a fà la cilca di li soldi illu paèsi mattessi e in chissi d’accultu. Si fulmà un cumitatu e li sό soci passani di ghjanna in ghjanna e tutti, pòari e ricchi, dunani di còri un ‘infelta in dinà cu l’auguriu chi ‘ussìa andatu tuttu alla meddhu. Era usànzia illi famili, pripparà li meddhu cosi boni pa lu gustàri e pa li stragni chi sarìani accuditi.

Nόi stéddhi aspittami la festa pà facci cuscì lu ‘istiri nόu sacrifichendi la pazenzia di li nostri mammi chi stagghjani finz’a notti talda pà cumprì la ‘este nόa. Lu ‘istiri era guasi un sìmbulu e un obbrìcu pà vinirà chissa santa ciurràta. Nisciunu si pudìa prisintà a ghjésgia malvistutu o cu lu ‘istiri di dugna dì : era un signali di rispettu pa li santi e pa iddhi mattessi. Celtu no s’andagghja a cumparalli ghjà pronti illi bruttèi comu è custumu di li tempi d’ogghj.

Li soldi erani pochi, ma l’inteltu era abbeddhu e no mancà puru la fantasìa. Mi pari d’idè a mamma, sippuru stracca da li faccéndi di casa, culva a sistà e a sagumà la stoffa illu modu più ghjustu e, candu, filu e acu a la manu, punìa tutta l’attinzioni a fà li punti dritti e a incialdinalla cun ricami e fiocchi o candu, cu la cara accippàta, facìa caminà cu abbilitai la prància a calboni innantu a lu pannu pà pranciàllu attenta a no brusgiàllu e a no fà pigghj. Era una ‘era imprèsa no fà màcchj e danni chi no si sarìani puduti accuncià.

Da chissi mani cussì amurόsi ni iscìa un veru capudòpara. Lu sonu di la banda musicali chi dìa accumpagnà li santi pa li carreri di lu paèsi mi sciutà chizzu e mamma m’ agghjutà a vistimmi . M’ammentu la cura chi vi punìa a pittinammi e infiucculinammi pà fa beddha mustra di la sό opara. Manna era la ciòia candu andagghja a la prucissioni e tutti ci figghjulami apparu ca ‘ussìa statu lu ‘istiri più beddhu.

Era guasi una prόa pa li mammi a ca v’ aìa missu più fantasia. No era vanitài la nostra, ma un modu pà fa palisà a fόra lu rispettu chi sintìami indrentu a l’animu, pà mustrà chi chissa ciurràta no era come tutti l’alti. Puru l’omini vi tiniani a accumpagnà li santi cun vesti nόi. Tuttu primma s’aìa cun sacrificiu e si gudìa cun spiritu più sanu.

La tradizioni di li festi paesani pà fultuna no s’è palduta, ancora si sò cambiati li modi di sintilli. Ogghj tuttu è più faccili e pa aè lu ‘istiri nόu no s’aspetta più la dì di festa palchì dugna dì è festa e tuttu è a pultata di manu. Li tempi sό diversi e puru li sintimenti. E’ tuttu un curri curri; li mammi no àni più tempu né gana di sistà lu ‘istiri in casa. Li bruttèi ni sò pieni e la pruppaganda ci bumbaldigghja e vinni sò pa tutti li gusti e li busciaccari. Lu ‘istiri di la festa no è più lu disicìu mannu di li ciòaneddhi chi no vi tenini più a accumpagnà li santi cun decoru e candόri, ma si ‘estini in modu strambu cun zappuli e alti sfrunzuli imposti da la moda.

Chissu ‘istiri chi mi cuscìa indossu mamma cu li sό mani proffumà di sacrificiu, di pazenzia e d’mόri, pruffumi chi no agattaragghju più in nisciun ‘istiri d’ogghj pal cantu priziosu possa esse e filmatu da lu meddhu stilista.