Bisiòne de unu diàlogu de su fogu chin s’abba[di Giuseppe Delogu]

S’abba e su fogu s’addobièsint in-d’una badde.

“E ite nobas?” nèsit s’abba a su fogu.

“Sas betzas” rispondèsit su fogu

“Non mi paret” li torrèsit s’abba “Non bides comente nos sun tratènde custos omines? Nan chi sa neche est nostra, de totus custos dannos e disàstros chi sun capitènde”

“Beru est” cunfirmèsit su fogu: “A bi pessare bene, deo puru l’apo intesu!  In sa televisiòne han ghettadu su bandu chi orriat: Totus contra a su fogu!”

“Tue giai l’ischis, in criantzia ti naro chi deo e tue non semus cumpatìbiles: ube bi ses tue deo soe evaporada e pro contras, cando bi soe deo de te non si bidet fumu… eppuru, pro una cosa o s’atera semper sas neches sun nostras.” sententzièsit s’abba.

Su fogu:“Eja, lampu cantu ses abista! a bi pessare bene tue e deo semus simetricos: tue tenes sa tendèntzia a falàre dae monte a mare, deo a che pesàre dae terra in artu de chelos”, nèsit su fogu.

“Dae cando esìstit su mundu, e s’omine galu non bi fit “ li azùnghet sàbia s’abba “sighìmus sos matessi caminos: rios, baddes, divisòrias  de monte sìnzan su movimèntu nostru: tue in artu e deo a giòsso; e in sas pianùras, prènas de terra fine chi apo trazàdu chin sa passièntzia de sos seculos, apo dadu a sos omines una prenda manna, pro chi potan tennere cada alimentu e cada cunfortu de vida. E issos ite fachen? Si-che ponen in mesu e su caminu meu, chircande de mi-che iscantzellare dae sa terra; ma s’unda manna no la firmat nemos”.

Su fogu: “Non mi-nde nias, pro piachère! Ello deo ite dia deper narrer?  Dae cando l’apo dadu s’ischintzìdda pro si caentare, paret chi s’omine si siat separàdu dae sos àteros animàles, e pro sèculos  hat biviu usande-mi e timende-mi, chin sapièntzia creschènde sa tzivilidàde sua. Como chi mi tenet intro de sa tecnologia paret chi no mi connoscàt prus e mi-che cheret eliminare. A bortas però che li fughit sa manu, e deo soe obrigadu a currere arrennegàdu che a fogu tentu dae unu monte a s’ateru, dae unu padente a s’ateru, lassande-li solu chisina”.

S’abba: “Custos omines de oje no ischin prus comente si depen cumportare: pro irmanniàre sa “tzivilidade” issoro nanchi depen fraigare domos in sos rios, serrande-mi intro de canales istrintos de ferru e cimentu , e però si-che prenan sos giardinos de matas  e erbas coloradas in beranu  (siccas che esca in istiu)… e pretenden, cando naturalmente cumparimus, de lis pedire permissu de caminare ube cheren issos. Ma, tue l’ischis, custu no est possibile.”

Su fogu: “Est abberu, sos caminos e sas carreras nostras sun sinzadas da-e sa natura: no podimus tenner ateru disizu che caminare in sas bias chi su mundu nos hat assinnadu, est inutile chi s’omine pesset de nos poder ponner briglias.”

Su fogu e s’abba, a una boche sola:  “Ca, tantu, nois semus prus fortes!”

 “Adiosu” saludèsit s’abba

“In bon’ora” li rispondèsit su fogu.